|
الكلمات المتقاطعة
بدل الكوره
ولعب الفوره
وسط الغاغه
والبرجاس
تاكل زغده
تاكلك دبشه
تملا دماغك
بالقلقاس
ياللا نفكر
حتة لعبه
زي السكر
بالأناناس
كلمه ومعنى
رأسي وأفقي
يحكوا حكاية
تهم الناس
قرب قرب
ياللا نجرب
شغل مخك
ولا تحتاس
_ واحد رأسي؟
رأسي بتضرب
تقلب
تشغي بالأفكار
مسرح
والأفكار هوامه
في الدوامه
ليل .. ونهار
أبيض إسود
أخضر ..أحمر
بارد .. حامي
جنه ..ونار
سيبك سيبك
من تغريبك
بكره الليل
يطلع له نهار
_ اتنين رأسي ؟
حاكم حالي
كان طرطور
خان الدار
والجار
والنور
_كل ما فينا من حكام
نازلين
من خنفس .. وكافور
كذبوا _ أفكوا
قتلوا _ سفكوا
غدروا _ خانوا
فضحوا _ هتكوا
_ واحد أفقي ؟
شاعر داعر
ميت .. حي
طالع .. نازل
رايح .. جي
مادح سيده
مادد إيده
لايشوف حاجه
ولا يقول شي
_ كل ما فينا من شعارير
خونه
وهتيفة .. وخنازير
تجروا _ باعوا
لمعوا _ ذاعوا
أفلوا _ غربوا
تاهوا _ ضاعوا
_ اتنين أفقي ؟
شعرا تلاته بكلمه باروده
ناظم
بيرم
بابلو نيرودا (1)
_ كل ما فينا من عشاق
داقوا ما بينا
من أشواق
حبوا _ عشقوا
شبوا _ نشأوا
مروا _ فاتوا
غرسوا _ رشقوا
_ رأسي وأفقي ؟
شاعر واعر
لازم جي
يملا عيون العالم ضي
كل ما فينا من أحزان
تستنظر عاشق فنان
يأتي _ يقبل
طائر _ بلبل
حرفي _ فني
يشدو _ يغني
وطني سكني
أهلي .. قومي
منكم فيكم
صحوي نومي
أنتم فكري
أنتم عملي
منكم توقي
فيكم أملي
هيوا _ لبوا
ثوروا _ هبوا
يشرق _ يسطع
صبح _ مطلع
يزرع _ يبني
نحصد _ نجني
نمرح _ نلعب
نشدوا _ نغني
واحد رأسي
نشدوا نغني
اتنين أفقي
نشدوا نغني
تالت خامس
عاشر ميه
نشدوا نغني
نشدوا نغني
نملا العالم
خضرة عفيه
نشدوا نغني
نشدوا نغني
اليويو
يا واد يا يويو
يا مبرراتي
يا جبنه حادقة على فول حراتي
أستك لسانك
فارد ولامم
حسب الابيج
يا مهلباتي
يا واد يا يويو يا مهلبية
فوق الصواني
سايحه وطريه
فى كل جلسه تلبس قضيه
وتخيل عليها
يا مشخصاتي
حسب الوظيفة
وأنت وشطارتك
تظهر حلاوتك
تظهر مرارتك
لو خفضوك ترفع حرارتك
لو صعدوك
تقلب جيلاني
وبالمناسبة
وأنت اللى أدرى
كان لك تحفظ على المبادرة
ليه النهاردة بترش بودره
يا بن الأبالسه
يا ملطفاتي
وفى النهاية
لك عندى كلمة
آخر طريقك زحل وضلمه
حيث ان آخر القرع ضلمه
يا إما كفته
عند العجاتى
معتقل القناطر
ميكي
بصراحه يا أستاذ ميكي
إنك رجعي وتشكيكي
قاعد لا مؤاخذه تهلفط
وكلامك رومانتيكي
ولا ناوي تبطل تكتب
بصراحه كلام بولوتيكي
عن دور الحل السلمي
وإستعماله التكتيكي
فى الوقت إللى إحنا صراحه
دايخين دوخه البلجيكي
وبلدنا لسه جريحه
وبتصرخ بالآفريكي
لو بات التار يا ولادي
ح يبات الذل شريكي
والشعب يقول يا بلادي
بالروح والدم أفديكي
وحاجات بصراحه بتحصل
فى بلدنا يا أونكل ميكي
بصراحه ولا أنت معايا
ولا طالل من شبابيكي
وكأنك مثلا موميا
للسلطان الانتيكي
أحياها لا ستعمالها
لاستعمار الامريكى
رجعت على هيئة
ميكي
القاهره / 1969
يا عرب
يا عرب
يا عرب
يا عرب في أي مصر
يا عرب
يا عرب
إسمعوا صوت شعب مصر
احفظوا لمصر المكان
وإحنا ع العهد إللي كان
مصر أوفي م الزمان
وانتوا عرفين شعب مصر
يا عرب
يا عرب
ياعرب يا أهل مصر
إللي خانوا العهد بينا
واستباحوا كل حاجه
واستهانوا بالعروبه
واستكانوا للخواجه
مستحيل حيكونوا منا
إحنا حاجه وهما حاجه
هما باعوا البندقيه
والوطن والجلابيه
وإحنا أصحاب القضيه
إحنا ما بنبعش مصر
يا عرب
ياعرب
يا عرب يا أهل مصر
يطلع الدجال بزيفه
يملا بحر النيل ضباب
ينزل الجلاد بسيفه
يزرع الموت والحزاب
يطول الليل زي كيفه
الصباح له ألف باب
وإحنا بوصلتنا ف ادينا
ما تخافوش م الليل علينا
مهما غبتوا عن عنينا
انتوا جوه في قلب مصر
يا عرب
يا عرب
يا عرب يا أهل مصر
سينا ولا
يافا ولا
حيفا ولا
دير يا سين
إسألوا الشمس إللي هاله
ع إللي صحيوا مبدرين
يزرعوها
نور وغله
دول جدودنا
ولا مين ؟
حقنا وحتما يعاد
بس لو بانت سعاد
والبيان ده
له معاد
والمعاد
حيكون ف مصر
المعاد
حيكون ف مصر
المرجيحه
يا عم ادريس
ياعم ادريس
يا بو المرجيحه والقواديس
ما جاش الدور ؟
عشان يطلع قادوسي لفوق
أبوس النور وأطفي لعلالي شوقي
وأغنى فى الهوي موال
على ورد الخدود والخال
وادوق الحب سحر حلال
وأشوف الدنيا
وأبقي عريس
ياعم ادريس
ياعم ادريس
ياعم ادريس على الدور
أدور وأطلع مع الطالعين
كفايه سنين ياعم ادريس
ياعم ادريس
كفايه سنين
وأنا وعيال
كما العصافير
رفاقه كلنا وفرافير
يا دوب يعلا الجناح بينا
يعدينا القادوس ويطير
ونرجع تاني لأفراحنا
ولا عرفنا الطريق من فين
وجينا
زي ما رحنا
حياري ومحرومين لاتنين
نداوي بالغنا جراحنا
ونرمي اللوم على الجناحين
وجرح النفس له وجعين
يبكي القلب
قبل العين
وقاضى الحظ له شرعين
لاهل البخت ... والمتاعيس
ياعم ادريس
ياعم ادريس
وآه لو بختنا يشوفنا
ونرمي الزهر يدينا
وقاضي الحظ ينصفنا
ويحكم بالامل لينا
ونتمرجح على كيفنا
وينساب القادوس
بينا
يا خدنا بعيد ويحدفنا
وعند الشمس يرمينا
على بحر النسيم نسبح
وتسرح فيه أمانينا
وفوق شط النجوم ننزل
وترسي هناك مراسينا
ويبقي الجو هليله
تلعلع فيه
غناوينا
ونبدر
فى الفضا حبه
غناوي
كلها محبه
تقول للهم يتخبي
وترقص فى الهوي الفوانيس
ياعم ادريس ياعم ادريس
القاهره / 1962
بقرة حاحا
ناح النواح والنواحه
على بقرة حاحا النطاحه
والبقره حلوب
حاحا
تحلب قنطار
حاحا
لكن مسلوب
حاحا
من أهل الدار
حاحا
والدار بصحاب
حاحا
وحداشر باب
حاحا
غير السراديب
حاحا
وجحور الديب
حاحا
وبيبان الدار
حاحا
واقفين زنهار
حاحا
وف يوم معلوم
حاحا
عملوها الروم
حاحا
زقوا الترباس
حاحا
هربوا الحراس
حاحا
دخلوا الخواجات
حاحا
شفطوا اللبنات
حاحا
والبقرة تنادي
حاحا
وتقول يا ولادي
حاحا
وولاد الشوم
حاحا
رايحين فى النوم
حاحا
البقرة إنقهرت
حاحا
فى القهر إنصهرت
حاحا
وقعت فى البير
حاحا
سألوا النواطير
حاحا
طب وقعت ليه
حاحا
وقعت م الخوف
حاحا
والخوف ييجي ليه
حاحا
من عدم الشوف
حاحا
وقعت م الجوع ومن الراحه
البقرة السمرا النطاحه
ناحت مواويل النواحه
على حاحا
وعلى بقرة حاحا
شيد قصورك
شيد قصورك ع المزارع
من كدنا وعمل إدينا
الخمارات جنب المصانع
والسجن مطرح الجنينه
واطلق كلابك
فى الشوارع
وإقفل زنازينك
علينا
وقلّ نومنا فى المضاجع
أدى إحنا
نمنا ما اشتهينا
واتقل علينا بالمواجع
إحنا اتوجعنا
واكتفينا
وعرفنا
مين سبب جراحنا
وعرفنا روحنا
والتقينا
عمال وفلاحين
وطلبه
دقت ساعتنا
وإبتدينا
نسلك طريق
مالهش راجع
والنصر قرب من عنينا
النصر أقرب
من إدينا
حسبة برما بمناسبة زيارة ابن الهرمة
كشف الرافضين
ببطارية ماركه - نانسين -
يهوديه عربيه
سته مشاغبين
وستميه سته وستين
واتنين صنايعيه
سبعة مداقرين
وسبعميه سبعه وسبعين
غاويين شيوعيه
ألف وستين
وربعميه
منهم عشرين
وتلاته وطنيه
أما الباقيين
فألف ميه وتمانين
طلاب وشضليه
تسعه وتمانين
من إللي راحوا تشرين
تحت المعديه
يبقي موافقين
حسب انضباط القوانين
والحسبه شرعيه
تسعه وتسعين وتسعميه وتسعه وتسعين
من ألف في الميه
أجري التدوين
بمبني بندر قافشين
وبلجنه مدنيه
طرطور الدين
رئيس نيابة هابشين
وشكوكو عدويه
وحسين حابسين ضابط مباحث عابدين
والست سريه
لجنة
عشرين
شبرا ومغاغة
وقلين
أسوان دقهلية
نيكسون بابا
شرفت يا نيكسون بابا
يا بتاع الووتر جيت
عملولك قيمه سيما
سلاطين الفول والزيت
فرشولك أوسع سكه
من راس التين على مكه
وهناك تنفد على عكا
ويقولوا عليك حجيت
ما هو مولد ساير داير
شيلاه يا صحاب البيت
****
جواسيسك يوم تشريفك
عملولك زفه وزار
تتقصع فيه المومس
والقارح والمندار
والشيخ شمهورش راكب
ع الكوديا وهات يا مواكب
وبواقي الزفه عناكب
ساحبين من تحت الحيط
واهو مولد ساير داير
شيلاه يا اصحاب البيت
****
عزموك فقالوا تعالى
تاكل بامبون وهريسه
قمت انت لأنك مهيف
صدقت ان احنا فريسه
طبيت لحقوك بالزفه
يا عريس الغفله يا خفه
هات وشك خد لك تفه
شوبش من صاحب البيت
واهو مولد ساير داير
شيلاه يا اصحاب البيت
****
خد مني كلام يبقى لك
ولو انك
مش حتعيش
لا حقول اهلا ولا جهلا
ولا تيجي ولا متجيش
بيقولوا اللحم المصري
مطرح ما بيسري بيهري
ودا من تأثير الكشري
والفول
والسوس أبو زيت
واهو مولد
ساير داير
شيلاه يا اصحاب البيت
بلدي وحبيبتي
الغرام فى الدم سارح
والهوي
طارح معزه
والحنين للقرب بارح
والنوي جارح
يا عزه
يا إبتسامه فجر هلت
بددت ليلي الحزين
يا ندى الصبح اللى ساسا
فوق خدودي الدبلانين
بلّ شوقهم
صحي لون الورد فوقهم
كل خد
وشم ورده
مين يدوقهم
غيرك انتي
ومين سواكي
يا حياتي
يا ملاكي
يا نسيم الحب لما هب
هز القلب هزه
يا هوي الاحلام يا عزه
الليلادي جم خدونى يا ملاكي
جوز تنابله
ونص دسته
من التيران
كنت باحلم يا حبيبتي
كنت باحلم
بيكي انتي
كنا قال
أنا وإنتي قال
ف جنينه خضرا
ومحاوطها البرتقان
والسيسبان
وإنتي جوا قرنفلايه
بالعبير بتستحمي
أجري يمك يا هوايا
تسبقينى وتجري يمي
أحضنك
وأشرب عبيرك
من شفايفك
والغصون
وأقفه وشايفه
بتراعينا
بس خايفه م العيون
والعيون بتقول كلام
والكلام
طاير حمام
بينادينا بالاغاني
ويهادينا بالسلام
كنتب بحلم يا حبيببتي
كنت با حلم
بيكي إنتي
أيوه انتي
ومين سواكي
يا حياتي
يا ملاكي
يا نسيم الحب لما هب
هز القلب هزه
يا هوى الاحلام يا عزه
وأنطلق فى الجو فجاه
يا حبيبتي
صوت مفاجاه
صوت يخلي الدم يجمد
إصحي يا أحمد
إصحي يا أحمد
وأنتهي الحلم الجميل
وابتدا الهم التقيل
_ فين إمام
_ إنتوا مين
- إحنا ناس مكلفين
تيجي سالك مش ح تتعب
وأحنا طبعا معذورين
- إنتوا دود الارض
والافه المخيفه
إنتوا ذره رمل
فى عيون الخليفه
إنتوا كرباج المظالم
والماسي
إنتوا عله ف جسم بلدي
إنتوا جيفه
- سكتوه ابن الكلاب
سففوه من التراب
فتشوا كل الآماكن
طلعوا رفوف الدولاب
كمموني يا حبييبتي
كتفوني يا حبيبتي
قومونى .. قعدوني
كل شعره فى جسمي
بالعين فتشوها
المخده من جنانهم
شرحوها
وإنتهي التفتيش
ما فيش
صدقيني
ما تخافيش
هو فيه يا عزه عندي ممنوعات
غير باحب الناس
وباكره السكات؟
بص واحد م التنابله
جوا عيني
وإنتي عارفه
عنيه صافيه وطيبين
زي كل عيون بلدنا يا حبيبتي
شباكين
ع القلب دوغري موصلين
كان مناه يلمح علامه خوف بسيطه
طب حييجي الخوف منين ابن
العبيطه
هو مين فينا الجبان
ولا مين فينا اللى خان
اللى قلبه بالمحبه وبالاماني
وبالربيع لاخضر مزهر
والاغاني
ولا كلب الصيد
وأسياده الاباطره
أكالين لحم البشر
فوق الصواني؟
هو مين فينا الجبان
ولا مين فينا اللى خان
هو بص فى عينى بصه
إرتجف وف حلقه غصه
واتعوج ومال وقال
جملتين مش مفهومين
أصله شاف صورتين جمال
فى العيون الطيبين
مصر فى العين الشمال
وإنتي فى العين اليمين
معتقل القلعه / 1972
|
غزة فى قلب العرب
ناح الحمام في الدوح
دمع البنفسج
سال
والورد
مال مجروح
من شكة الموال
قال الحمام .. ياليل
ويا عيني
ع اللي إنقال
مين يشتري الفيروز؟
غزه .. مع الدلال!
من فين يا شابه النسب
وبنت مين في الناس ؟
ومين في ناسك حسب
وعطاكي.. للنخاس!
بحرين عيونك أسى
ساقيين .. قلوب الناس
من فين يا شابه النسب
وبنت مين
في الناس !؟
قالت _ بلهجة عرب _
غزه .. في قلب العرب
حره .. وأهلي عرب
خالص
وبنت حلال
_ ألا أونا بنت العرب
للبيع
ومين قال كام ؟
سنيوره شبه القمر
مصنوعه .. للأحلام
يا حلال
على المقتدر
وع الغلابة حرام
دق الجرس بالعدد
واحد
ومين قال كام ؟
البنت من بدعها
ضحكت
ومن قلبها
عشقت
ومن وجدها
سمع الوجود زلزال
_ لايا عديم التنا
لاانت
ولا البايعين
سوق النخاسة جبر
والأهل بالملايين
أبويا باني الحرم
وامي من القدسين
ومصر
فيها الهوى
والعزوه
في الشرقين
حلفت بالمرحمه
والدم
والملحمة
والفارس اللي حمى
ما امشي
ورا الأندال
ما امشي
ورا الأندال
الراوي _ قال الراوي
يا سادة يا كرام
صلوا على خير الأنام
الحلم في العلم
بكره اللي جاي
أخضر
والشعر في الحلم
فارس بيتمخطر
راكب حصان السبق
شاهر
حسام قاطع
رايح يجيب النبأ
زي النهار
ساطع
ويطلع الفجر
فوق السحاب لاغبر
يا سامع الشعر
فكر
تشوف أكتر
وحدوه
حكايتنا
كانت من قديم القدم
ولسه كاينه
وياما لسه تكون
طول ما العمار مسكون
بالغفلانين ياما
طول ما الغضب مكنون
جوه الصدور
ياما
طول ما القليل حاكمين
والمحكومين ياما
طول ما احنا متخانقين
والشمتانين .. ياما
طول مااحنا نبقي كده
والظلم
فوق كل دا
ممكن تعود الحكاية
من أول المشوار
وتلف بينا الرحايا
دوار
ما بعده دوار
ويخش ديب الصبايا
في عباية السمسار
ياكل فراخنا العتاقي
ويدبح
اللي صغار
الحلم
يتأخر
والشعر
يتبخر
ويغرق الشمس
بحر الضباب الاصفر
يا صاحب العقل
فكر
تشوف أكتر
وحدووووه
القواد الفصيح
سلمي يا عزيزة على الأستاذ
فنان اليوم
والمستقبل
محمود محمود محمود الباز
بنتي السنيورة القمورة
على فكره
بترقص ممتاز
ارقصي يا عزيزة متنكسفيش
محمود بقي منا خلاص ولا فيش
يا عزيزه النيزه كوا نيزه
كان ممكن
تطلعي مركيزة
تكي تم تكي تم تكي تم
تم تم
الرقص النقص يزيح الهم
تكي تم تكي تم تكي تم
تم تم
ويمشّى الحال
ويجري الدم
تكي تم تكي تم تكي تم
تم تم
على فكره يا كابتن محمود
وبرغم الكبت الموجود
أنا راجل ثوري متحرر
وعزيزه بتلعب على العود
إلعبي يا عزيزه متنكسفيش
ويخلي القعده شهيه
يا عم
ترالم ترالم ترالم
لم لم
أنا رأيي يا سيد محمود
وبرغم الصمت المقصود
إنك فنان المستقبل
ونشيد العصر المنشود
قربي يا عزيزة من الأستاذ
محمود ما بقاش محمود الباز
محمود بقي منا خلاص
ولا فيش
يا عزيزه النيزه كوا النيزه
كان لازم تطلعى مركيزه
ترالم ترالم ترالم
لم لم
العود النود
بيزيح الهم
ترالم ترالم ترالم
لم لم
محمود بقي منا خلاص ولا فيش
قربى يا عزيزة ما تتاخريش
يا عزيزة النيزه كوا النيزه
أنا رأيي إنك مركيزه
هلالم هلالم هلالم لم لم لم
محمود النود بقي نازل هم
هلالم
هلالم
هلالم لم لم
وعزيزه النيزه
تحب الهم
هلالم
هلام
هلالم لم لم
سجن الاستناف / 1973
رسالة إلى السجن
حبيبي يا مجرم يا سافل
يا دون
يا رب السوابق
يا رد السجون
رزالتك معاهم
ونمك عليهم
دا زائد جنانك
ونعم الجنون
جابولي وجابولك
وياما يجيبوا لنا
لان البلد دي
حاكمها القانون
توقع ما بينى وما بين
الحكومه ؟
دي برضك حكومه
وأنا إيش أكون
أديك رحت مورته
وحتروح بشرطه
وحيفسحوك
فى جميع السجون
وأنا مش ح أزورك
كما كنت فاهم
ولا كنت فاهم
ولا يحزنون
القاهرة / 1979
يا مرحرح
يا مرحرح خالص مالص
يا رقيق جدا وسمين
يا غصين إلبان يالا للي
يا خواتي
على الطعمين
يا حلولا
يا ورده يا فله
يا معشش فى البساتين
يا بو شعر مسبسب سايح
من صهد البريانتين
يا منور فى التشريفه
ومضلم فى التخمين
يا بو كرش مدور
كور
من لحم البني آدمين
يا صباح الخير يا لفندي
يا نهارك
رحرح خالص مالص
ولا سائل فى التانيين
مرعوب كده ليه يا حلاوه
ومفاصلك ليه سايبين
وتموت فى الدبلوماسيه
وتخاف م الفدائين
وتشوف الحل السلمي
فى الراديو وفى الجرانين
تتنهد من معاميعك
وتقول قادر يا معين
ما تصح النوم وتفوق
وتشوف بتكلم مين
الشعب بخير يا مرحرح
والناس كلك عارفين
مين إللى خان يا بهيه
ومين قتل ياسين
ومين بهدل بلدنا
ومين ومين ومين
ويا مصر يا أول صوره
فى عيون المولودين
ويا مصر يا آخر صورة
فى عيون الميتيين
يا بلدنا
يا بكره ولادنا
يام الدنيا والدين
يام الولدات المجدع
والبنتات الطعمين
يحرم إسمك علينا
ونعيش متغربين
لو سبنا الذل يدوسك
أو عشنا مغلوبين
ويا سينا
أكيد جايينك
ناخذ بتار ياسين
القاهره / 1967
الشيخ عاشور
سلام مربع يا بلد
للشيخ عاشور
قلب الاسد
سلام يا واد
على دا ودا
لو دسته منه
فى البلد
ما كانش كان
كل اللي كان
ولا كان دا حالك يا بلد
مدد يا شيخ عاشور
مدد
مدد يا شيخ عاشور مدد
القاهره / 1968
ورقه .. من ملف القضية
= إنت شيوعي
- أنا مصراوي
=إنتو مصايب إنتو بلاوي
- ممكن أعرف مين الأول بيكلمني
= إحنا نيابة أمن الدولة
- دول مين
= دولة مصر
- مصر العشه ولا القصر
= أيوه حنبدي ندور ونلف حاجه تنرفز خالص
إف
- مالك ... شايل طاجن خالك
= لم لسانك ما تخرفش
- أنا ما اقصدش اهانتك طبعا
=أيوه استعبط
- لاما اعرفش
= إيه رأيك في سفارة كوريا
- إيه رأيك في قضية مصر
= مصر ف وحده
هى وسوريا وليبيا ولازم ييجي النصر
- ييجي منين وازاى ولمين
= آدى كلام الشيوعيين
- أنا من حقي
=حق ف عينك
- أنا بتكلم بيني وبينك
= يعني كلام بره التحقيق
- إذا كانش يسبب لك ضيق
= طيب قول
- مين مسئول ؟
= مين مسئول عن إيه يا إخينا
- ع إللي جرى لنا ف غزه وسينا
= أنت شيوعي أكيد وطاوعني
فض دمغك من دي قضيه شعبنا جاهل
مهما تقول له
مش حيآمن بالشيوعية
- ما الشيوعية فى فيتنام
إيه رأيك فيهم يا همام
= مش بطال مش بطال
لكن إحنا .. ورانا عيال
- طب ما نحارب لجل عيالنا
يطلعوا أسعد من أجيالنا
= إنت الظاهر مخك فاضي
وحتتعبني معاك ع الفاضي
وأنا بحبحت معاك بكفايه
إبقي اتفلسف عند القاضي
- هى قضيه ؟
= لأ ملوخية
أمال فاهم إيه آمال هى الدولة دى لعب عيال
- ممكن أعرف أنا هنا ليه
= أيوة حتعرف
أمال إيه
يوم خمسه وعشرين الماضي
إيه مشاك عند التحرير
- تحرير إيه يا جناب القاضي
= أنا مش فاضي
- بكره تصير
= بطل غلبه وجاوب دوغري
- أنا غلباوي كده من صغري
= كل الشيوعيين أمثالك
آخر غلبه وقله ذوق يحصل إيه لو تمشي ف حالك
فاكر نفسك مين
ما تفوق
- لو راح افوق
مش من مصلحتك
= أنا معجب جدا بصراحتك
إيه رأيك فى حكايه الطلبه
- حاجه عظيمه بشرة خير
= إنت دماغك ينفع جزمه
- وانت لسانك ينفع سير
= إخرس قطع لسانك سافل
- كتر خيرك
= مخك قافل
مين وداك بقي عند الطلبه رايح ضمن المندسين
- رحت أناقشهم واسمع منهم
= تسمع منهم إيه يا سي طين
دول عايزين الدنيا تولع علشان أصلا
مش فاهمين
هى الحرب يا عالم لعبه
دى بتتكلف بالملايين
= وأنت حتدفع إيه من جيبك
- امال ح ادفع من جيب مين
إنت حمار وخدوك فى مشمك رحت هناك زى الباقيين
عاملين لجنه
وقال وطنيه
مش ممكن دول وطنيين
وجماعة أنصار الثورة
وفلسطين وهباب الطين
ما نخلينا يا سيدي في حالنا
مالنا ومال الفدائين
هو إحنا اللي نهبنا بلدهم
دول عالم صيع فاقدين
قتلوا الراجل عند الشيراتون
وإحنا إللي طلعنا القاتلين
- وصفي التل دا كلب وخاين
= اهو كل العالم خاينين
واحد صاحبي مراته مرافقه
وهو مرافق
ييجي عشرين
أمريكا بتزعل وبتحرن
هو إحنا يا عالم ناقصين
مش نستعبر
م إللي جرالنا
ونعيش بقي زى العايشين
دي عيال عملا للشيوعيه
وإحنا عدو الشيوعيين
- ورق دمك بس يا بيه
مين مساعدكو بقالكو سنين
= بيساعدونا صحيح يا سي بعجر
علشان أصلا مش فاهمين
إحنا حيلتنا منين نديهم
ونسددهم بالملايين
= يمكن يعني قضيه مبدا
- مبدا مين وزكايب مين
هي دى عالم تعرف مبدا
دولا باقول لك
ناس مجانين
اخترعولنا السد العالي
علشان نبقي اشتراكيين
إشتراكيه هناك ف بلدهم
وإحنا ف دارنا
نعيش حرين
عايزين الفلاح الجاهل
يتساوى بالمحترامين
وكمان قال
تحديد ملكيه
أبو ألفين
يدوه خمسين
شغل ملاحده وعالم كفره
ومخالفين أحكام الدين
والعمال رخرين اسم الله
فاهمين روحهم
بني آدمين
ناس عايزين الحرق بولعه
دا كله من الشيوعيين
نشروا لنا الأفكار السوده
أولاد الكلب الملاعين
مين وداك بقي عند الطلبه
انطق قول
اتكلم مين
- هما إيه مطالبهم ؟
= انت حتستجوبني يا شاطر
- لأمش قصدى
بس أنا باسأل
كانوا طالبين كراريس ومساطر
ولا مطالب ميه الميه
كل الشعب مآمن بيها
=دول طالبين حرب وشعبيه
مين مجنون بقي
حيمشيها
عايزين يدوا الرتش سلاح
عشان تحصل فيها مجازر
أنا لو أشوف حلوف فلاح
شايل شومه
لازم اهاجر
- لازم بينه وبينك دم
= دم ف عينك
هس اتلم
ثم نحارب ليه
وبايه
بسلاح ما يموتش بعوضه
- ورق دمك بس يا بيه
الحرب ضروره ومفروضه
واهو نفس سلاحنا المظلوم
في فيتنام دابح أمريكا
= دى طبيعه أرض يا بني آدم
- بطلوا بقي كدب وبولوتيكا
طب ما الهند بنفس سلاحنا
فى باكستان
بعزقت الغرب
=رأيك يعني ضروري ان إحنا
وحتما يعني نخش الحرب
طيب
حاضر
فين المخبر
حتغير رأيك
بالضرب
التضليل
دا شيعه
واحنا سنه
دا فين ومصر فين !
عايزين يدخلونا
نظام ودنك منين
وناس تقول شيوعي
وعامل نفسه شيعي
عشان خايفين طبيعي
ليبقوا ثورتين
يا أسيادنا اللصوص
قرينا ف النصوص
لو الإنسان يلوص
يغوروا الفرقتين
وشفنا ف الكتاب
ولقينا الدين حساب
وثورة وانتساب
وعين تساوي عين
وسرقتوا الثورة منا
وقلتوا الصبر منّه
وعقب الصبر جنّه
وباب بمفتاحين
ودان المَلُك ليكو
وزاد الفجر بيكو
وعملتوا اسلامين
وكفرتوا الامام
وطفشتوا الحمام
وخلاصة الكلام..
يزيد ولاّ الحسين !??
محلا القصايد
محلا القصايد
في الشدايد
والغنا
محلا الكلام والحب
أوقات الشقا
إحنا إللي تهنا ع الطريق
من بعضنا
متفرقين
والسجن هو الملتقى
آه يا رفاقه
من متاهات الطريق
لما الليالي بيتخنق فيها القمر
يمشي الصديق في الظلمه
يخبط في الصديق
والسكه بنت الخطوتين
تاخذ سنه
إحنا النهارده فين
وكام
وبكره كام
وبعده فين
وبتنا إيه
صحبنا إيه
وكنا فين
بقينا فين
فى كل يوم بنزور مكان
وكل يوم بنزيد عدد
وكل يوم نفتح بيبان
وكل يوم بنزيل سدد
وكل يوم يطلع بُنا
وكل يوم ينزل هدد
وكل يوم نحبل غنا
وكل يوم نولد مدد
جوا السجون
برا السجون
إحنا كده
لازم نكون
محلا القصايد
في الشدايد والغنا
محلا العيدان الخضر
فى الربع الخراب
إحنا إللي تهنا ع الطريق
من بعضنا
متجمعين
بنخط كلمه من كتاب
ملعونه قامه تنحني
بالقهر
من حاكم
وخان
ملعونه كلمه تنتني
فى الحلق
تهرب م اللسان
ملعونه ساعه
تنحسب م العمر يفنيها الخضوع
ملعونه لقمه مغمسه بالذل
ملعون الجبان
آه يا رفاقه
يا للي علمتوا الصلابه
للحجر
بانده لكم وسط الرتابه
والكأبه
والضجر
يا مقربين الفجر نوره
ومطلعه
مدوا المسامع
في المجامع
واسمعوا
صرخه مغني الحي من جوف العدم
اتجمعوا
اتجمعوا
اتجمعوا
|
